Aso.. ich mach det wietr, woni geschtr ufghört han:
Ich han need würkli mitihberächnet gha, dass i au no durt Security muess, drum bini dänn churzfrischtig no in Stress cho. Und ich han au no müesse zu Gate 6, wo glaubs öppe 8 Abflüg um di gliech Ziit gha hät. D Security i Amsterdam hät mi ziemli sträng dunkt. Ich bi gscannt worde, abr need so, wie z Züri zum Biespiel, sondern sones komischs 3D-Ding, wot muesch dristah und dänn schwirrt sonen Sensor a dir verbi, und dänn bini no abtaschtet worde. Woni min Laptop und alles dänn wiedr ha welle ihpacke, hät de Eint au no es Problem gha mit mim Etui und häts namal zwoimal dur de Scanner gschickt... Und dänn hani dörfe in Flügr. I de gliiche Reihe wie ich isch no es zwoits Meitli vo STS gsi, en Holländeri, ich ha sie erchännt ah ihrem STS-Tischi und STS-Täschi, wommer muess ahha. Ich ha das Zügs abr need debi gha, drum hät sie mich need erchännt. Ich ha sie abr need chöne druf ahspräche, will en Frau zwüsche eus es Buech gläse hät.
Es Foti usm Flugzüg. D Frau näb mir hät gseit, es seg 'Bath', und sie muesses wüsse, sie isch britisch (hät Harry Potter gläse und Tee trunke).
Am Flughafe bin ich zäme mit zwei anderi Meitli, ennere Holländeri und ennere Dütschi, und eme Bueb us Holland dä vo de Wendy, eusere STS-Betreueri, abgholt worde. Die beide Meitli sind dänn bi de Familie abglade worde (sie wohned zäme) und ich wohn jetzt bis am Mittwuch bi de Wendy, will dänn mini Familie heichunt. De Holländr wohnt en Strass obe vo da.
Woni da ahcho bi, hani de Danny, de Maa vo de Wendy, känneglert, und mer händ all zäme Fernseh gluegt - The X Factor, Red or Black, The Jonathan Ross Show. Es wohnt no en Italienneri im glieche Huus, wo da für drü Mönet studiert, Mit ihre hani Znacht gässe. Spötr hani dänn no en Tschech käneglert, wo au da wont. D Tochtr vo de Wendy und em Danny isch au churz verbicho und hät ihri Tochtr mitbracht, 'Faith':). Han dänn de ganz Abig Fernseh gluegt und sie hät a mine Chleidr umegspielt. Sie isch uuuh herzig, würd eu gern es Foti vo ihre zeige, muess abr dä zersch no um Erlaubnis fröge. Abr das hani hüt morge vo ihre uf mim Handy gfunde:
Unde rächts isch sie:))
Sonntag 2. September
Hüt isch en rächt ruhige Tag gsi, zum Zmorge hani sonen änglische Butter probiert, wo uh fein isch (ziemli salzig) und de Tschech isch hüt abgreist. Han wiedr mit de Faith zäme Fernseh gluegt... zersch irgend sonen Sändig und dänn 'Beauty and the Beast'. Spötr bini mit de Italienneri chli go laufe und sie hät mer zeigt wo all Busstatione sind. Jetzt hämmr grad Znacht gässe und gönd jetz go luege wie Brennnessle uf Änglisch heissed und was de Underschied isch zwüsche Jam und Marmelade (Hüt bim Zmorge hät de Danny gseit, Marmelade gitz nur mit Orangegschmack und Jam isch alles andere).
Morn gangi s erschtmal d Schuel go ahluege und all Fächr bestimme, abr richtig fangts ersch Mitti Wuche ah. Villich gangi nachher dänn no uf Bristol (gaht vo da her ca. 35min mitem Bus).
Händs guet
xx Alex
No comments:
Post a Comment